Ўзбекистонда халқ сайилларини, концерт-томоша ва маданий-оммавий тадбирларни ўтказишда белгиланган талабларга сўзсиз риоя этилиши юзасидан назорат кучайтирилади, дея хабар бермоқда «Газета.uz».
Бу ҳақда ҳукуматнинг 9 декабрь кунги «Концерт-томоша фаолиятини амалга ошириш тартибини янада такомиллаштириш чора-тадбирлари тўғрисида»ги қарори (pdf)да айтилади.
Қарорда Ички ишлар вазирлиги, Фавқулодда вазиятлар вазирлиги, Маданият ва спорт ишлари вазирлиги, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларига оммавий тадбирларни ўтказиш объектларини мунтазам равишда хатловдан ўтказиш ва техник жиҳатдан текшириш, шу жумладан, уларнинг муҳандислик-техник коммуникациялари, ёнғинга қарши, эвакуация иншоотлари, ер ости йўллари ва транспорт воситаларининг тўхтаб туриш жойлари, дастлабки тиббий ёрдам кўрсатиш пунктлари, техник ускуналар, фавқулодда вазиятларни бартараф этиш учун зарур бўлган махсус воситаларнинг ҳисобланган захираси ва турлари ҳолатини текшириш бўйича амалий чора-тадбирларни ўтказиш юклатилди.
Улар оммавий тадбирларнинг ўзига хос хусусиятларидан, шунингдек, оммавий тадбирларни ўтказиш объектлари жойлашган жойлар ва объектларнинг шарт-шароитларидан келиб чиққан ҳолда фавқулодда вазиятлар бўйича ҳудудий бошқармаларнинг зарур махсус воситалар ва техника билан таъминланган малакали мутахассислари ишга жалб этилишини таъминлаш топширилди.
Изоҳ (0)