Ўзбекистон Вазирлар Маҳкамаси концерт-томоша фаолиятини мувофиқлаштириш ва назорат қилиш, маданий-оммавий тадбирларни ўтказиш, бадиий жиҳатдан юксак мусиқа асарларини яратиш соҳасидаги ишларга масъул вазирликлар ва идоралар фаолиятини танқид қилди, деб ёзади «Газета.uz».
Ҳукуматнинг 9 декабрь кунги «Концерт-томоша фаолиятини амалга ошириш тартибини янада такомиллаштириш чора-тадбирлари тўғрисида»ги қарори (pdf)да Маданият ва спорт ишлари вазирлиги, «Ўзбекнаво» эстрада бирлашмаси, Миллий эстрада санъатини ривожлантириш ва мувофиқлаштириш Кенгаши, Қорақалпоғистон Республикаси Вазирлар Кенгаши, вилоятлар ва Тошкент шаҳри ҳокимликларининг, Ўзбекистон миллий телерадиокомпаниясининг концерт-томоша фаолияти соҳасини мувофиқлаштириш ва назорат қилишга доир ишлари қониқарсиз деб аталди.
Қарорга илова тарзида Концерт-томоша фаолиятини лицензиялаш тартиби тўғрисида Низом келтирилди, у Ўзбекистон Республикасида ва унинг ташқарисида концерт-томоша фаолиятини лицензиялаш тартибини, шунингдек, ижрочиларнинг рейтинг гуруҳларини белгилаш бўйича мезонлар ва малака талабларини белгилайди.
Маданият ва спорт ишлари вазирлигига концерт-томоша ва маданий-оммавий тадбирларни чуқур ва ноформал ғоявий мазмун билан тўлдириш, ижодий уюшмалар, давлат ва нодавлат ташкилотлари билан мустаҳкам ҳамкорлик ўрнатиш топширилди. «Ўзбекнаво эстрада бирлашмасига лицензия ва рухсатнома талаблари ва шартларига қатъий риоя этилишини таъминлаш юкланди.
Изоҳ (0)