Хонанда Ботир Қодиров ўзининг ноябрь ойидаги концерт дастури вақтида «Истиқлол» санъат саройига моддий зарар етказгани ҳақидаги хабарларни рад этиб чиқди. Бу ҳақда «Даракчи» газетаси хабар бермоқда.
Аввалроқ исми ошкор этилмаган бир журналист хонанданинг ўзидан рухсат сўрамай, унинг оилавий ҳаёти ҳақида китоб нашр эттириб, концерт вақтида сотганидан аччиқланиб, Ботир Қодиров жаҳл устида саҳнани тарк этгани, ғазабини боса олмай, эшик, ойналарни синдириб, иситиш мосламаларини бузиб ташлагани ҳақида хабар берилган эди.
«Мен китоб нашрдан чиққани ва сотилгани ҳақида билганимдан сўнг, продюсерларимга жаҳл қилдим, буни тан оламан. Лекин ойнани мен синдирмадим», — деди Ботир Қодиров «Даракчи» газетасига берган интервьюсида.
«Бу продюсерларимнинг иши. Ўша китоб масаласида мен уларга қаттиқ гапирдим ва продюсерим жаҳл устида эшикни тепиб очганди, ойнаси чил-чил бўлди», — деди хонанда.
Ботир Қодировнинг қўшимча қилишича, бу ҳолат учун санъат саройи раҳбарияти Ботир Қодировнинг ижодий жамоасини жаримага тортган.
Изоҳ (0)