2015 йилнинг 4 декабрь куни Алоқа тарихи музейида ZiyoNET ахборот-таълим порталининг 10 ёшга тўлиши муносабати билан матбуот анжумани ҳамда лойиҳалар сарҳисоби, эришилган натижалар, ўтказилаётган кўрик-танлов ва акцияларда фаол иштирок этаётган ёшларни тақдирлашга бағишланган тадбир бўлиб ўтди. Бу ҳақда Ахборот технологиялари ва коммуникацияларини ривожлантириш вазирлиги расмий сайти хабар бермоқда.
Uzinfocom маркази қошида 2005 йил 28 сентябрда фаолиятини бошлаган ZiyoNET тармоғи томонидан 2006 йилда ишга туширилган ZiyoNET портали таълим, илм-фан, маданият, иқтисод, ижтимоий ҳаёт соҳаларини ўзида бирлаштирган йирик портал вазифасини ўтамоқда.
Таълим портали доирасида Uznet’да энг йирик ўқув қўлланма, санъат ва ижод, турли йўналишдаги таълимий материалларнинг электрон базаси ташкил этилган. Ундан 80 000 дан зиёд турли хил ўқув ва методик қўлланмалар, авторефератлар, маъруза матнлари ва бошқалар ўрин олган. Яна бир муҳим жиҳати, унда болаларнинг билим даражасини ривожлантирувчи электрон ўйинлар тақдим этилган.
Ўзбекистон Республикасидаги Британия консуллиги билан ҳамкорликда болалар учун инглиз тилини ўрганишга мўлжалланган 400 га яқин онлайн ўйинлар жойлаштирилган.
Бундан ташқари, «uTube.uz» миллий видеопорталининг «Хорижий тиллар» бўлимидан 400 дан ортиқ хорижий тилларни ўргатувчи видеокурслар жой олган.
Яқин кунларда ZiyoNET Ресурс Маркази томонидан яна бир йўналиш ўзлаштирилган бўлиб, Ўзбекистонда илк бора, таълимий онлайн радио – uRadio.uz лойиҳаси ишга туширилди.
Шунингдек, аудиокитоблар, аудиоэртаклар ҳамда онлайн радионинг барча эшиттиришлари ва дастурларини ўз ичига олувчи «Aудиокитоблар» бўлими ҳам ўз фаолиятини бошлаган.
ZiyoNET тармоғи ёшлар ўртасида акция ва кўрик-танловларни ташкил этиш орқали уларнинг интернетдаги вақтларини мазмунли ўтказишига эришиш, уларни тўғри мақсадга йўналтиришга ҳам хизмат қилмоқда. Мисол учун, ўзбекистонлик ёшлар фаол иштирок этган «Ўзбекистоннинг етти мўъжизаси» акциясида ёшлар томонидан мамлакат миқёсида 377 та маданий, тарихий ва замонавий иншоотларнинг суратлари ҳамда улар тўғрисида маълумот тақдим этилди.
Изоҳ (0)