Facebook компаниясидаги акцияларининг 99 фоизини «яхшироқ олам» қуриш учун сарфлашга ваъда берган ижтимоий тармоқ асосчиси Марк Цукерберг хайрия ташкилотларига қўйилган чекловлар туфайли бундай фонд учун маблағ сарф қилмайди, деб ёзади Meduza.
Хайрия ташкилотларига бизнесга сармоя киритиш ва лоббизм билан шуғулланиш тақиқлангани Цукербергга маъқул келмаган.
Шу сабабли Цукерберг ва унинг рафиқаси Присцилла Чан ўз хайрия ташаббусини тижорат ташкилоти сифатида рўйхатдан ўтказди. Унинг қўшимча қилишича, ташкилотнинг бундай шаклда бўлиши унга солиқлар тўлаш мажбуриятини юклайди.
Facebook раҳбари сўзларига кўра, авваламбор, компания таълим, соғлиқни сақлаш, одамларни бирлаштириш ва кучли ҳамжамиятлар тузиш билан шуғулланади.
Эслатиб ўтамиз, Марк Цукерберг ва Присцилла Чан янги туғилган қизига мактуб ёзиб, унда қизалоқ вояга етиши умид қилинаётган олам ҳақида ҳикоя қилган эди.
Цукербергнинг маълум қилишича, у ва унинг турмуш ўртоғи жаҳондаги барча болалар учун шундай оламни қуришда ёрдам бериш учун кичик ҳисса қўшади. «Биз Facebook’даги акцияларимизнинг 99 фоизини — ҳозирги вақтда уларнинг қиймати 45 миллиард долларга тенг — ҳаётимиз давомида бу оламни кейинги авлодлар учун янада яхшилаш учун йўналтирамиз», — деб ёзди Марк Цукерберг.
Кейинроқ Цукербергнинг қарори жамоатчилик эътиборини тортиш мақсадидаги ҳаракат деб баҳоланган, баъзи журналистлар Facebook асосчисининг ушбу қадамини тадбирли деб ҳисоблаган, чунки бизнесмен ўз рафиқаси Присцилла Чан билан акцияларни ўзлари очадиган компания орқали сарфлаши айтилган эди.