iPhone смартфони, топқирлик ва фавқулодда ҳолатларда саросимага тушмаслик Австралиянинг Суон-Хилл шаҳрида яшовчи 11 ёшли Лара Албанга онасининг ҳаётини сақлаб қолишида ёрдам берди. Бу ҳақда «Hi-Tech Mail.ru» хабар бермоқда.
Кечки пайт Лара пони отини сайрдан сўнг отхонага қўйиб чиқаётганида қичқириқни эшитади. Ортига ўгирилган қиз ерда ётган ва инграётган онаси Шонани кўриб қолади. Югуриб борган Лара унинг юзи қонга беланганига гувоҳ бўлди: аёл оиланинг эркатойи бўлган Нала лақабли от тепкиси туфайли жиддий жароҳат олганди. Қиз қўрқиб кетди, бироқ саросимага тушмади. Онасининг телефонини олиб, қутқарув хизматига қўнғироқ қилди, сўнг 17 дақиқа давомида уларнинг телефон орқали айтиб турган тавсияларини бажариб, биринчи тиббий ёрдам кўрсатди.
Чақириқ бўйича етиб келган шифокорлар қоронғида уйни адаштириб қўйди, бироқ Лара бу гал ҳам шошиб қолгани йўқ ва iPhone фонарчасидан фойдаланиб, уларни чорлади. Шу туфайли Шонага вақтида тиббий ёрдам кўрсатилди.
Синган жағига олтита платинали пластина қўйилган аёлнинг айтишича, агар қизи бўлмаганида воқеа содир бўлган куни ҳаётдан кўз юмган бўларди. Лара маҳаллий тез тиббий ёрдам хизмати вакиллари томонидан St. John Ambulance Community Hero Award мукофоти билан тақдирланди. Уларнинг айтишича, қиз фавқулодда вазиятда ўзини анча-мунча катталарга қараганда хотиржамроқ ва ақллироқ тутган.
Изоҳ (0)