Тошкент шаҳар жамоат транспорти йўловчиларида шаҳар автобуслари ҳаракатини смартфонлар воситасида кузатиш имкони пайдо бўлди. Бу ҳақда «Газета.uz» хабар бермоқда.
VIA-TASHKENT компанияси томонидан ишлаб чиқилган VIA.UZ мобил дастури (iOS учун, Android учун) ёрдамида керакли автобуснинг тегишли бекатга келиш вақтини билиш, автобуслар ҳаракати жадвали билан танишиш ва ҳатто транспорт воситасининг харитадаги ҳаракатини кузатиш мумкин.
Дастур керакли автобусни йўналиш рақами, бекат ёки фойдаланувчи турган жой бўйича аниқлаш имконини беради. Қулайлик мақсадида аниқ бир бекатларни кўрсатган ҳолда шахсий йўналишлар рўйхатини тузиш мумкин.
«Лойиҳамиз йўловчиларнинг вақтини тежашга ёрдам беради, чунки энди уларда сафарларни режалаштириш имкони бор», — деди VIA-TASHKENT директори Мурод Обидов «Газета.uz»га берган интервьюсида.
Ҳозирги вақтда мобил дастурда 20 га яқин автобус йўналишлари (№№ 1, 11, 13, 14, 16, 29, 31, 33, 60, 67, 87, 88, 95, 98, 121, 122, 141, 144 ва 147) бўйича ахборот мавжуд эмас.
«Мазкур йўналишларнинг ҳаракат чизиғи ўзгарган, уларнинг маълумотлари ҳозирги вақтда аниқлаштирилмоқда. Фойдаланувчиларни чалғитмаслик мақсадида, мазкур йўналишларни вақтинча ўчириб қўйдик», — деди Мурод Обидов.
Ишланма муаллифлари ҳам мобил дастур бўйича, ҳам шаҳар жамоат транспорти фаолияти бўйича таклиф ва мулоҳазаларни мамнуният билан қабул қилади (мурожаатларни мобил дастур воситасида юбориш мумкин).
Тез орада VIA.UZ сайти ишга тушади, унда ҳам шаҳар жамоат транспорти ҳаракатини кузатиш мумкин бўлади.
Лойиҳа «Тоштрансдиспетчерхизмат» корхонаси ва Тошкент шаҳар ҳокимлигининг Йўловчи транспортининг барча турлари ҳаракатини лицензиялаш ва мувофиқлаштириш департаменти иштирокида ишлаб чиқилди.
Изоҳ (0)