Pepsi компанияси ўзининг Pepsi Phone сматфонини ишлаб чиқаришни йўлга қўйиш учун зарур суммани йиғишга улгурганича йўқ, ҳолбуки, маблағ йиғиш бўйича дастур ноябрь ўрталаридаёқ бошланган эди, деб ёзади «Hi-tech.mail.ru».
Натижа экспертларнинг ҳафсаласини пир қилди — Pepsi кампания якунланишига бир неча кун қолганида зарур сумманинг ярмидан камроғини тўплашга эришди.
Таниқли газли ичимлик ишлаб чиқарувчи 3 декабргача 3 миллион юань (тахминан 470 минг доллар) йиғишни ўз олдига мақсад қилган эди, бироқ айни пайтгача маҳаллий фуқаролар 1,3 миллион юангина (200 минг доллар) хайрия қилди. Кампания яна уч кун давом этади.
Хитой бозори қурилмага компания умид қилган даражада қизиқиш билдирмади, деб ёзади нашр.
Эслатиб ўтамиз, Pepsi Phone 5,5 дюймли, 1920×1080 пикселли 2,5D дисплейга эга бўлди. Шунингдек, унда 64 бит, 1,7 ГГц частотали саккиз ядроли MediaTek MT6792 процессори, 2 Гб тезкор ва 16 Гб доимий хотира, 13 мегапикселли асосий ва 5 мегапикселли олд камера ҳамда 3000 мАс сиғимга эга аккумулятор мавжуд.
Слот иккита SIM-картадан фойдаланишга мўлжалланган. Смартфон тўртинчи авлод LTE мобил тармоғини «кўтара олади». Pepsi Phone’нинг ўлчамлари 152,2×76,2×7,7 мм, оғирлиги 158 граммга тенг. Гаджет корпуси мовий, олтин ва кумуш рангларда чиқарилади.
Смартфон, шунингдек, тобора машҳур бўлиб бораётган бармоқ излари сканерига ҳам эга.
Изоҳ (0)