Россиянинг Красноярск ўлкаси шимолидаги Игарка шаҳри яқинида Ми-8 вертолётининг ҳалокатга учраши оқибатида қурбон бўлганлар сони 12 кишига етди. Бу ҳақда «РИА Новости» Красноярск ўлкаси шифохонаси матбуот котиби Ирина Кочеткова маълумотига таяниб хабар беради.
«Турухан» авиакомпаниясига қарашли Ми-8 вертолётининг 26 ноябрь, пайшанба куни Игарка яқинида ҳалокатга учраши оқибатида 11 киши ҳалок бўлганлиги маълум қилинган эди. Жабрланганлардан 14 нафари шифохонада бўлиб, улардан саккиз нафари жонлантириш бўлимида эди.
«Жонлантириш бўлимига бош-мия шикастланиши билан етказилган эркак вафот этди. Яна олти киши жонлантириш бўлимида бўлиб, уларнинг барчаси сунъий нафас берувчи қурилмаларга уланган», — деди Кочеткова.
У бир нафар беморнинг аҳволи яхшиланганлиги учун жонлантириш бўлимидан травматология бўлимига ўтказилганлигини маълум қилди.
Изоҳ (0)