Иордан дарёсининг ғарбий соҳилида яшовчи киши Исроил аскарлари билан 26 ноябрь, пайшанба куни юзага келган тўқнашув натижасида ҳалок бўлди ва бу билан можаронинг сўнгги икки ой давомида авж олиши натижасида юзинчи фаластинлик қурбонга айланди. Бу ҳақда Фаластин Соғлиқни сақлаш вазирлиги маълум қилди, деб хабар беради «РИА Новости».
Исроил ҳарбийлари томонидан Қуддус яқинидаги Катанна қишлоғида олиб борилган ҳарбий ҳаракатлар натижасида тўқнашувлар юзага келиб, бунинг оқибатида 21 ёшли фаластинлик ўлдирилди.
«Унинг ўлими билан ўлдирилган фаластинликлар сони юз кишига етди», ― деб хабар беради Фаластин Соғлиқни сақлаш вазирлиги. Идора тақдим этган манбаларга кўра, ҳалок бўлганлар ичида Ғарбий соҳил фаластинликларидан ташқари, Ғазо секторидан 18 нафар киши ва бир нафар араб миллатига мансуб Исроил фуқароси ҳам бор.
Исроил армияси матбуот хизматининг хабар беришича, Катанна беш нафар террористик ҳаракатларда гумон қилинган киши қўлга олинган, қурол-яроғ мусодара қилинган. Ушбу рейд натижасида маҳаллий аҳоли билан тўқнашувлар юзага келиб, тўқнашувлар давомида ҳарбийлар норозиликни келтириб чиқарганларга қарата ўт очган.
Бир неча соатдан сўнг, Ғарбий соҳилдаги исроиллик чегарачилар пичоқ билан ҳамла қилмоқчи бўлган фаластинликка қарата ўт очган. Ҳарбийлар ва полиция ҳужумчининг аҳволи ҳақида хабар бермаган. Фаластиннинг «Маан» агентлиги манбаларига кўра, у ҳалок бўлган.
Изоҳ (0)