Туркия президенти Ражаб Тоййиб Эрдўғон Россиядан Туркия ҳаво кенгликларини бузиб киргани учун узр сўрашни талаб қилди. Meduza хабарига кўра, Туркия давлат раҳбари бу ҳақда турк қирувчилари томонидан 24 ноябрь куни уриб туширилган Россиянинг Су-24 бомбардимончи самолёти қулаши муносабати билан айтиб ўтган.
«Агар кимдир узр сўраши керак бўлса ҳам, бу биз эмас. Узрни бизнинг ҳаво чегараларимизни бузганлар сўраши керак. Бизнинг учувчиларимиз ва қуролли кучларимиз шунчаки ўз мажбуриятларини бажарди», — деди Эрдўғон.
Туркия Россияга тегишли Су-24 самолётининг қулаши учун узр сўрашдан бош тортишини мамлакат ташқи ишлар вазири Мевлют Чавушўғлу ҳам маълум қилганди. «Ўзимиз ҳақ бўлган вазиятда узр сўрашга ҳожат йўқ», — деди у.
Россия президенти Владимир Путин 26 ноябрь куни Туркиянинг ҳаракатларини «ҳамкор ва террорчиликка қарши курашда иттифоқчи сифатида кўрилганлар томонидан орқадан хиёнаткорона берилган зарба» деб атади.
«Биз Туркиянинг олий сиёсий табақалари амалга оширилган мазкур жиноят учун кечирим сўраганликларини, етказилган зиён ва зарарни қоплаб бериш таклифларини, жиноятчиларни жазолаш ҳақидаги ваъдаларини ҳали ҳам эшитганимиз йўқ. Туркия раҳбарияти Россия—Туркия муносабатларини онгли равишда боши берк кўчага олиб киряпти, деган тасаввур пайдо бўлмоқда, биз бундан афсусдамиз», — деди Путин.
Воқеа: Туркия уриб туширган Су-24
Изоҳ (0)