«Кексаларни эъзозлаш йили» Давлат дастури ижроси доирасида Қорақалпоғистон Республикасида жорий йилнинг ўтган даврида 138 миллиард 495 миллион сўм ва 652,6 минг доллар миқдорида маблағ сарфланди, деб хабар беради ЎзА.
— Давлат дастури ижросини таъминлаш бўйича уруш ва меҳнат фронти фахрийлари мамлакатимизда ишлаб чиқарилган замонавий телевизор ва уяли алоқа воситалари билан бепул таъминланди, – дейди Қорақалпоғистон Республикаси Вазирлар Кенгашининг ижтимоий ривожлантириш масалалари бўйича котибияти бошлиғи Т.Абдухолиқов. – Манзилли рўйхат асосида қишлоқ врачлик пунктлари ва оилавий поликлиникалар томонидан дори-дармон бепул тарқатилди.
406 нафар уруш ва меҳнат фронти фахрийси, шунингдек, ёлғиз ва ижтимоий ёрдамга муҳтож кексаларнинг уйи таъмирланди. Касаба уюшмалари ташкилотлари томонидан 671 нафар кексага моддий ёрдам кўрсатилди. 9 минг 700 га яқин қария чуқурлаштирилган тиббий кўрикдан ўтказилди. Бир ярим мингдан зиёд уруш ва меҳнат фронти фахрийси, кекса ва ногиронларга санаторийларга бепул йўлланмалар берилди.
Абдухолиқовнинг таъкидлашича, кексаларни озиқ-овқат маҳсулотлари билан таъминлаш, коммунал хизматлар тўлови ва уй-жойларини таъмирлашга 19 миллион сўмдан ортиқ ҳомийлик ёрдами кўрсатилди. Шаҳар ва туман ҳокимликлари, касаба уюшмалари ташкилотлари ҳамкорлигида 4 мингдан зиёд нуронийнинг Хива, Бухоро, Самарқанд, Тошкент шаҳарлари ва Қорақалпоғистон Республикаси ҳудудидаги тарихий обидаларга саёҳатлари уюштирилди.
Изоҳ (0)