Газпромбанк раҳбари Путиннинг қизи ҳақида ҳикоя қилганларини инкор этмоқда

10 ноябрь, сешанба куни Газпромбанк бошқаруви раиси ва директорлар кенгаши раҳбарининг ўринбосари Андрей Акимов Reuters агентлиги унинг номидан эълон қилган Катерина Тихонова Россия президенти Владимир Путиннинг қизи эканлиги ҳақидаги маълумотни рад этди. Бу ҳақда банк матбуот хизмати маълум қилган, дея хабар беради Forbes.

«Жаноб Акимов бундай гапларни айтмаган. У шундай нуфузли агентлик айтилган сўзларни нафақат нотўғри етказгани, балки бузиб талқин қилганидан ҳайратда қолди, — дея таъкидлаган банк матбуот хизмати. — Газпромбанк «Иннопрактика» билан ҳамкорлик қилади, бироқ на бошқарув раиси, на унинг ходимлари Тихонова хонимнинг қариндошлик алоқалари тўғрисида маълумотга эга эмас».

10 ноябрь, сешанба куни Reuters Андрей Акимов Катерина Тихонова раҳбарлик қилаётган ва Москва давлат университети илмий-технологик шаҳарчасини яратишда иштирок этаётган «Иннопрактика» фонди васийлик кенгаши аъзоси эканлиги маълум қилинган мақолани эълон қилганди. Макур мақолада агентлик Газпромбанк раҳбарининг «Мен у Путиннинг қизи эканлигини билардим. Бироқ биз МДУ лойиҳасини оилавий алоқалардан қатъи назар қўллаб-қувватлаш тўғрисида қарор қабул қилдик», деган сўзларини келтирган.

Reuters манбаларига кўра, 29 ёшли Катерина Тихонова Россия президентининг эски таниши сифатида ЕИ санкциялари рўйхатига кирган «Россия» банки акционери Николай Шамаловнинг ўғли Кирилл Шамаловга турмушга чиққан бўлиб, жуфтлик 2 миллиард доллар активларга эгалик қилади. Улар асосан Кирилл Шамалов Путиннинг дўсти тариқасида санкцияларга тушган яна бир миллиардер — Геннадий Тимченкодан сотиб олинган «Сибур» нефтгаз компаниясидаги улушдан иборат. Reuters’нинг таъкидлашича, Шамалов уч йил аввал Тимченкодан 3,7 миллион долларга баҳоланган Биаррицадаги (Франция) тўрт қаватли виллани ҳам сотиб олган.

Россия президенти матбуот котиби Дмитрий Песков Катерина Тихонова Путиннинг қизи ва Шамаловнинг рафиқаси эканлиги тўғрисидаги овозаларга ойдинлик киритиш ҳақидаги илтимосга жавобан «Биз Тихонова хонимнинг шахсий ҳаёти, оилавий ҳолати, яқинлари, илмий фаолияти, лойиҳалардаги иштироки тўғрисида ҳеч қандай маълумотга эга эмасмиз. Кейинги йилларда Владимир Путиннинг оилавий алоқалари, жумладан, қизлари тўғрисида ҳаддан зиёд кўп миш-мишларнинг гувоҳи бўляпмиз. Бу манбалардаги аниқ маълумот улуши кулгили даражада кам», — дея маълум қилган.