Кэти Перри энг кўп даромад оладиган аёл мусиқачи деб тан олинди

Forbes журнали энг кўп даромад оладиган аёл мусиқачилар рейтингини тузди, дея хабар бермоқда «РБК».

Унда хонанда Кэти Перри 135 миллион долларга тенг йиллик даромад билан етакчилик қилди. Бунга Перри Prismatic World Tour тури ҳамда Coty ва CoverGirl каби косметика брендлари билан тузилган шартномалар туфайли эришди.

Тейлор Свифт «1989» номли альбоми 8,6 миллионта нусхада сотилгани ва дунё бўйлаб турнесини бошлаб юборганига қарамай, 80 миллион доллар даромад билан иккинчи поғонада жойлашди. Таққослаш учун, Перрининг 2013 йилда чиқарилган сўнгги альбоми Prism айни пайтгача тахминан 4 миллионта нусхада сотилган.

Учинчи ўринни Fleetwood Mac гуруҳи эгаллади, унинг таркибида эркаклар ҳам бор. Бироқ икки нафар солист қиз туфайли гуруҳ рейтингга киритилди. Унинг йиллик даромади 59,5 миллион долларни ташкил этди.

Юқори бешликни Lady Gaga (59 миллион доллар) ва Бейонсе (54,5 миллион доллар) якунлади.