Олий Лига 29-туридан ўрин олган дастлабки учта учрашув 4 ноябрь, чоршанба куни бўлиб ўтди. «Uff.uz» хабарига кўра, Қаршида «Насаф» «Пахтакор»ни, Олмалиқда «Олмалиқ» «Бунёдкор»ни қабул қилган бўлса, Тошкентда «Локомотив» «Машъал» билан баҳс олиб борди.
«Олмалиқ» — «Бунёдкор» учрашуви 1:1 ҳисобидаги дуранг натижа билан якунланди. Дастлаб «Бунёдкор» ҳужумчиси Воҳид Шодиев ҳисобни очган бўлса, иккинчи бўлимда «Олмалиқ» вакили Шавкат Саломов ҳисобни тенглаштирди. «Локомотив» — «Машъал» учрашуви тақдирини ягона гол ҳал қилди — Марат Бикмаев урган гол «темирйўлчилар»га ғалаба келтирди.
Мусобақа пешқадами, Тошкентнинг «Пахтакор» клуби 2015 йилги Ўзбекистон Кубоги соҳиби «Насаф»ни 1:0 ҳисобида мағлуб этиб, навбатдаги чемпионлик сари янада яқинлашди. «Пахтакор»га ғалаба келтирган гол учрашув якунланишига 15 дақиқадан камроқ вақт қолганида Камолиддин Тожиев ҳисобига ёзилди.
4-турнинг қолган барча учрашувлари 5 ноябрь, пайшанба куни Тошкент вақти билан 14:00 да бошланади. Шу куни «Қўқон-1912» — «Сўғдиёна», «Шўртан» — «Навбаҳор», «Бухоро» — «Нефтчи», «Андижон» — «Динамо» ва «Қизилқум» — «Металлург» баҳслари бўлиб ўтади.
29-турнинг дастлабки уч ўйинидан сўнг, мусобақа жадвалининг юқори қисмидаги вазият ўзгаришсиз қолди. Чемпионат якунланишига бир тур қолганида «Пахтакор» 72 очко билан пешқадамлик қилмоқда, 2-ўриндаги «Локомотив» ҳисобида 71 очко бор. 3-ўриндаги «Насаф» бронза медаллар эгасига айланиб бўлди — жамоа «Локомотив»га ета олмайди, 4-ўриндаги «Бунёдкор» эса «Насаф»га ета олмайди.
30-турда «Пахтакор» ўз майдонида мусобақа ауцайдерларидан бири «Андижон»ни қабул қилади, «Локомотив» эса «Навбаҳор» меҳмони бўлади. Сўнгги турда «Локомотив» қайд этган ҳар қандай натижани (ғалаба, дуранг ёки мағлубият) такрорлаш «Пахтакор»ни амалда Ўзбекистон чемпионига айлантиради.
Изоҳ (0)