Бухарестдаги тунги клубда содир бўлган ёнғин қурбонлари сони 32 кишига етди. 3 ноябрь, сешанба куни тонгда Руминия пойтахтидаги авлиё Пантелеймон касалхонасида танасининг 50 фоизи куйган 28 ёшли қиз вафот этган. Бу ҳақда «РИА Новости» хабар бермоқда.
Мамлакат ички ишлар вазирлиги давлат котиби Раед Арафат қурбонлар сони икки баробар ортиши мумкинлигини истисно этмади. Айни пайтда касалхоналарга 135 киши турли даражадаги жароҳатлар билан ётқизилган. Улардан 88 кишининг ҳолати оғир эканлиги айтилмоқда.
Руминия пойтахтида жойлашган тунги клубдаги ёнғин 30 октябрдан 31 октябрга ўтар кечаси юз берди. Ёнғинга рок-концерт вақтида отилган мушак сабаб бўлган бўлиши мумкин.
Эслатиб ўтамиз, Молдова расмийлари ёнғинда жабрланганлар учун қон тўплаш кампаниясини бошлади.
Изоҳ (0)