Тошкентда давом этаётган Халқаро саноат ярмаркаси ва кооперация биржаси доирасида Самарқанд автомобиль заводи («SamAvto») двигатели сиқилган табиий газ (CNG)да ишловчи автобусни намойиш этди. Бу ҳақда «12news.uz» хабар бермоқда.
CNG двигателли автомобилларнинг экологик жиҳатдан фойдали, шунингдек, иқтисодий самарадорлиги сабаб мазкур автобусга бўлган эҳтиёж ҳам юқори бўлиши тахмин қилинмоқда.
«SamAvto» бозордаги тенденцияларни ҳисобга олган ҳолда, ISUZU Motors кўмагида CNG двигателли йўловчи автобус ишлаб чиқаришга қарор қилди.
Юқори «Евро-4» экологик стандартига мос келувчи CNG двигателли мазкур автобуслар маҳаллий йўловчи транспорти ишлаб чиқариш тармоғининг янги сифат даражасига кўтарилишига имкон беради.
Ўзбекистон ҳукумати қарорига мувофиқ, ISUZU ва «SamAvto»нинг қўшма лойиҳаси доирасида 2011 йилдан CNG двигателли тижорий автомобилларни ишлаб чиқариш бошланган.
2013 йили газ двигателида ҳаракатланувчи юк автомобиллари реазилация қилиниши бошланган бўлса, 2014 йили завод CNG двигателли ихтисослашган чиқинди ташувчи автомобилларни етказиб бериш учун буюртма олди.
Айни вақтда «SamAvto» паст полли LE60 шаҳар автобусларини ишлаб чиқаришни давом эттирмоқда. Завод шу русумдаги дастлабки автобусларни Ўзбекистоннинг бир қатор автосаройларига етказиб берди.
Заводда ҳозирги вақтда йўловчи сиғими 56 кишигача, двигателининг қуввати 100—190 от кучи оралиғида бўлган тўрт турдаги автобуслар, шунингдек, 7 моделдаги юк ва махсус автомобиллар ишлаб чиқарилмоқда.
«SamAvto» заводи 2007 йилдан бери Isuzu Motors агрегатлари базасида 22 мингдан ортиқ автобус ва юк машиналари ишлаб чиқаришга улгурди.
Изоҳ (0)