Хизмат кўрсатиш соҳасидаги микрофирма ва кичик корхоналар учун ягона солиқ тўлови ставкасини 2016 йилдан эътиборан 6 фоиздан 5 фоизгача пасайтириш режалаштирилмоқда. Бу ҳақда «Газета.uz» хабар бермоқда.
Бу депутатлар томонидан муҳокама қилинаётган 2016 йилга мўлжалланган давлат бюджетининг, давлат мақсадли жамғармалари бюджетларининг лойиҳалари, шунингдек, солиқ ва бюджет сиёсатининг асосий йўналишларида назарда тутилган.
Кўзда тутилаётган ўзгаришлар хўжалик юритувчи субъектларга солиқ юкини янада пасайтириш, уларнинг моддий-техника базасини мустаҳкамлаш ва ходимларни рағбатлантириш учун қўшимча манба яратишга йўналтирилган.
Ягона солиқ тўлови ставкасининг пасайтирилиши 55,8 миллиард сўмни хизмат кўрсатиш соҳасида ишлаётган микрофирма ва кичик корхоналар ихтиёрида қолдириш, хизмат кўрсатиш соҳасини мамлакат ЯИМдаги улушини 55 фоизга етказиш имконини беради.
2016 йил учун мўлжалланган солиқ ва бюджет сиёсати лойиҳасида ободонлаштириш ва ижтимоий инфратузилмани ривожлантириш солиғи, фойда солиғи, ягона солиқ тўлови, қўшилган қиймат солиғи ва бошқа бир қатор солиқ ва бошқа мажбурий тўловларнинг амалдаги ставкаларини сақлаб қолиш таклиф этилмоқда.
Эслатиб ўтамиз, 2015 йилдан бошлаб микрофирма ва кичик корхона ҳисобланган қурилиш ташкилотлари учун ягона солиқ тўлови ставкаси 6 фоиздан 5 фоизгача пасайтирилган эди.
Изоҳ (0)