АҚШнинг General Motors корпорацияси транспорт воситаларининг ва ҳатто гараж ҳамда қурилиш иншоотларининг ёниб кетишига сабаб бўлган двигателлардан мой оқиши муаммоси сабаб ўзининг 1,4 миллион автомобилини чақириб олади. Бу ҳақда «ТАСС» хабар бермоқда.
Компания вакили Ален Эдлернинг маълум қилишича, мазкур камчиликни оддий таъмир йўли билан ҳал этиш бўйича кўрилган чоралар кутилган самарани бермагани сабаб, автомобилларни чақириб олишга зарурат туғилди.
Маълум бўлишича, оддий таъмирдан ўтган автомобилларнинг 1,3 мингга яқинида ёнғин чиқиши ҳолати юз берган. Бунда гап 1997 йилда ишлаб чиқарилган моделлар ҳақида бормоқда.
General Motors вакилининг қайд этишича, бу қадар кўплаб автомобилларнинг таъмир учун чақирилиши, мазкур чора оқибатлари кўлами ҳали белгиланмагани сабаб, корпорациянинг тўртинчи чоракдаги даромадларига таъсир қилиши мумкин.
«Мазкур носозликни бартараф этиш йўли ҳали белгиланмагани сабаб, автомобилларни чақириб олиш билан боғлиқ харажатлар даромадларга таъсир қилиш-қилмаслиги ҳақида ишонч билан фикр билдира олмаймиз», — дея қайд этди Эдлер.
Изоҳ (0)