БМТ Бош котиби Асаднинг Путин билан учрашуви Суриядаги низоларни ҳал қилишда ёрдам беришига умид билдирди

БМТ Бош котиби Пан Ги Мун Сурия президенти Башар Асаднинг 20 октябрь кунги Москвага ташрифи ва унинг Россия президенти Владимир Путин билан учрашуви Араб Республикасидаги низоларни тинч йўл билан ҳал қилиш истиқболларига ижобий таъсир этишига умид қилмоқда, деб ёзади «Газета.ru».

«Мен Суриядаги низонинг ҳарбий ечими йўқлиги, у сиёсий бўлиши кераклигини бир неча марта такрорлаганман», — деди у.

У президент Асад президент Путин билан учрашув натижасида буни тушуниб етишига умид билдирди. «Умид қиламанки, бу динамиканинг ўзгаришига олиб келади», — дея қўшимча қилди Пан Ги Мун.

Эслатиб ўтамиз, 20 октябрь куни Башар Асад Москвага ташриф буюрган, Путин у билан Сурияда Россия ҳарбий-космик кучлари операциясининг давом эттирилиши билан боғлиқ масалаларни муҳокама қилган эди.

Кейинроқ АҚШ ҳукумати Сурия президенти Башар Асад Россияда ташриф билан қабул қилингани юзасидан норозилик билдирди.