Тайванлик аёл АҚШга учаётган самолёт бортида бола туғгани учун жаримага тортилиши мумкин. Associated Press хабарига кўра, учувчилар чақалоқнинг хавфсизлигини таъминлаш мақсадида Аляскадаги аэропортлардан бирига қўнишга мажбур бўлган.
Тайвань матбуоти хабарларига кўра, аёл тахминан 33 минг доллар тўлаши керак бўлади. China Airlines авиакомпанияси вакилларининг сўзларига кўра, суғуртачи ҳозирча ҳисоб-китобларни якунига етказмаган.
Хабар беришларича, аёл фарзандининг Америка фуқаролигини олишини хоҳлаган ва парвоз давомида мунтазам равишда лайнер АҚШ ҳаво бўшлиғига кирган-кирмаганлигини сўраб турган.
Аляска ижтимоий хизмат кўрсатиш департаменти бошлиғи Сьюзан Морганнинг сўзларига кўра, самолёт чақалоқ туғилганидан сўнг биринчи бўлиб АҚШ аэропортига қўнган, шу сабабли ҳам унга АҚШ фуқаролиги берилади.
«Бу, биргина унинг фарзанди АҚШ фуқаролигини қўлга киритиши учун амалга оширилган худбинона қилмишдир. У бошқа йўловчиларнинг парвозига халал берди, шунинг учун ҳам жазога лойиқ эмасми?», — дея вазиятга изоҳ берган Тайвандаги ҳукмрон партия вакили Ло Шу-Лей.
Жаҳонда фуқароликни қўлга киритишнинг икки асосий тамойили — «қон тамойили» ва «тупроқ тамойили» мавжуд. АҚШда амал қилувчи «тупроқ тамойили»га мувофиқ, мамлакат ҳудудида туғилган чақалоқ АҚШ фуқаролигини олади.
Изоҳ (0)