Франция БМТ Хавфсизлик Кенгашига Сурияда «бочкали» бомбалардан фойдаланишни ман этиш юзасидан резолюция тақдим этади. Бу ҳақда Франция ташқи ишлар вазири Лоран Фабиус 23 октябрь, жума куни БМТнинг Сурия бўйича махсус вакили Стаффан де Мистура билан учрашувидан сўнг маълум қилди, дея хабар беради «Ведомости».
«Биз Башар Асад тузуми тинч аҳолига бомба ёғдиришни тўхтатганига ишончимиз комил бўлиши лозим», — дея таъкидлаган Фабиус. У келгуси ҳафтада Парижда Германия, Буюк Британия, АҚШ ва Саудия Арабистони ташқи ишлар вазирлари тўпланиши, «бу рўйхатга Россия вакили киритилмагани»ни билдирган.
Олдинроқ Германия канцлери Ангела Меркель Москвани Башар Асадни «бочкали» бомбалар ташламасликка кўндиришга» чақирган эди. Франциянинг БМТдаги доимий вакили Франсуа Делатр бензин, мих, шрапнел ва портловчи моддалар билан тўлдирилган бомбани «террор қуроли» деб атади.
Изоҳ (0)