Қозоғистонлик Геннадий Головкин 72,6 килограммгача бўлган вазнда Бутунжаҳон бокс ассоциацияси (WBA), Бутунжаҳон бокс кенгаши (WBC) камарларини ҳимоя қилиб ва Халқаро бокс федерацияси (IBF) камарини қўлга киритиб, уч йўналиш бўйича чемпионлик унвонларини ўзида жамлади. Нью-Йоркда бўлиб ўтган 12 раундли жангда у IBF йўналишидаги аввалги чемпион, канадалик Давид Лемье устидан 8-раундда техник нокаут билан ғалаба қозонди. Бу ҳақда «ТАСС» хабар бермоқда.
Беллашув Головкиннинг катта устунлиги билан ўтди. Бешинчи раунд охирида томошабинлар биринчи нокдаунга гувоҳ бўлди, бироқ Лемье қийинчилик билан бўлса-да, жангни давом эттиришга ўзида куч топди. Ҳакам 7-раундда бурнидан қон кетаётган канадаликнинг олдига шифокорни чақирди. 8-раундда, Лемье рақиб ҳужумларига жавоб бермай қўйгач, рефери жангни тўхтатди.
Головкин 15-марта WBA, учинчи марта WBC камарини ҳимоя қилди ва Лемьедан IBF чемпионлигини тортиб олди. 33 ёшли қозоғистонлик ҳозиргача мағлубият нималигини билмаяпти: унинг ҳисобида жами 34 та ғалаба бор (улардан 31 таси нокаут билан). Лемье билан жанг учун унга 2 миллион доллар берилиши кафолатланган.
Изоҳ (0)