Франция пойтахти Париж шаҳрида дзюдо бўйича «Катта Дубулға» туркумига кирувчи йилнинг нуфузли мусобақаларидан бири ўз якунига етди. Дунёнинг кўзга кўринган полвонлари орасида Ўзбекистон дзюдочилари ҳам мазкур турнирда ўз имкониятларини синовдан ўтказди, деб хабар беради «Оламспорт».
Хабар берганимиздек, мусобақанинг биринчи куни -60 кг вазн тоифасида ўзбекистонлик Шарофиддин Лутфуллаев бронза медали билан тақдирланган эди.
Кеча, 18 октябрь куни -81 кг вазн тоифасидаги Шаҳзод Собиров барча рақибларини таслим этиб, «Катта Дубулға» турнири ғолибига айланди. Собиров финал баҳсида россиялик Сергей Рябовни мағлуб этишнинг уддасидан чиқди.
Шаҳзод ярим финалда ғолиблик учун асосий даъвогар ҳисобланган мўғулистонлик Ууганбаатар Отгонбаатарни таслим этди. Чорак финалда голландиялик Франк Де Вит ҳам мағлубиятга учратилди. Иккинчи ва учинчи даврада эса мос равишда чехиялик Яромир Мусил ҳамда венгриялик Шаболз Крижан баҳслардан чиқариб юборилди.
Шу тариқа, Ўзбекистон дзюдо терма жамоаси Париждаги нуфузли мусобақада умумжамоа ҳисобида битта олтин ва бронза медали билан бешинчи ўринни эгаллади. Тўртта олтин, битта кумуш, бешта бронза медалига эгалик қилган Япония терма жамоаси кутилганидек, умумжамоа ҳисобида биринчи бўлди. Кучли учликка Франция ва Мўғулистон терма жамоалари якун ясади.
Изоҳ (0)