Жаҳон чемпионати — 2018 иккинчи саралаш босқичи, 5-тур ўйинлари доирасидаги Баҳрайн — Ўзбекистон учрашувидан кейин жамоалар бош мураббийлари иштирокида матбуот анжумани ўтказилди. Унда дастлаб Ўзбекистон миллий терма жамоаси бош мураббийи Самвел Бабаян иштирок этди. Бу ҳақда Ўзбекистон футбол федерацияси матбуот хизмати хабар бермоқда.
«Авваламбор, юртимиздаги барча футбол мухлисларни муҳим ғалаба билан табриклайман! Биз йигитлар билан ушбу ғалабани жамоани чин дилдан қўллаб-қувватлаб турган ҳақиқий мухлисларга бағишлаймиз. Ўйинга тўхталадиган бўлсам, биринчи бўлимда ўз вазиятларимиздан фойдалана олмагандик. Аммо иккинчи бўлимда буни тўғрилашга эришдик. Бугун биз ўзимизни тартибли жамоа сифатида намойиш эта олдик. Жамоа ўйиндан-ўйинга яхшиланиб боряпти. Менимча, жамоанинг ўсиши яққол сезилиб турибди», — деди Ўзбекистон миллий термаси бош мураббийи.
Самвел Бабаян, шунингдек, ўйинда аввал ишлаб чиқилган режа бўйича ҳаракатланилгани ва иккинчи бўлимда мавжуд тактика ўзгартирилмагани ҳақида ҳам гапириб ўтган.
«Бугун бизнинг ғалабамизни таъминлаган нарса — Баҳрайннинг кучсизлигимас, биринчи навбатда, бизнинг тартибли ўйин намойиш қилганимиз бўлди. Биз рақибнинг энг кучли қуроли бўлмиш — ҳужумдаги ўйинини зарарсизлантира олдик. Ўз дарвозамиз дахлсизлигини сақлаб қолишни уддаладик. Ҳужум чизиғимизда ҳам кучли клубларда ўйнайдиган маҳоратли футболчилар йиғилган. Шунингдек, тобора футболчиларнинг ўзаро бир-бирини тушуниб ҳаракат қилиши ҳам йўлга қўйилиб бориляпти. Шунинг учун ҳам рақиблар дарвозасини ишғол қилиш масаласида ишларимиз яхши кетяпти, деб ўйлайман. Танаффусдан кейин айнан нимани ўзгартирганимиз ҳисобига ўйинимиз яхшироқ чиққани ҳақида эса гапирмайман. Баҳрайн билан яна бир ўйинимиз бор ва шу сабабдан сирларни очиш ниятим йўқ», — деб алоҳида таъкидлаган Ўзбекистон миллий терма жамоаси бош мураббийи.
Эслатиб ўтамиз, Ўзбекистон терма жамоаси Манамадаги ўйинда Баҳрайн устидан 4:0 ҳисобида ғалаба қозонди.
Изоҳ (0)