Қатар пойтахти Доҳа шаҳрида бокс бўйича катталар ўртасида ўтказилаётган жаҳон чемпионатининг иккинчи кунида Ўзбекистон чарм қўлқоп усталаридан уч нафари ғалаба қозонди, деб хабар беради Ўзбекистон Миллий олимпия қўмитаси матбуот хизмати.
Ўзбекистоннинг энг оғир вазндаги боксчиси Баҳодир Жалолов (+91 кг) ўзининг биринчи жангини ғалаба билан якунлади. Жазоир вакили Муҳаммад Гримесга қарши баҳс юритган Жалолов рақибидан анча устун эканлигини намойиш этди ва 3:0 ҳисобида ғалаба қозонди. Баҳодир Жалолов 9 октябрь куни ўтказиладиган нимчорак финалда кубалик Линер Перога қарши рингга кўтарилади.
7 октябрь куни рингга кўтарилган ўзбекистонлик Элнур Абдураимов (-60 кг) ва Элшод Расулов (-81 кг) ҳам дастлабки ғалабаларни қўлга киритиб, совринли ўринлар учун курашни давом эттирадиган бўлди.
Эслатиб ўтамиз, биринчи кун бўлиб ўтган мусобақаларда Муроджон Аҳмадалиев (-56 кг) ва Бектемир Мелиқўзиев (-75 кг) рақиблари устидан иончли ғалабаларни қўлга киритган эди.
Иккинчи кунги мусобақалар якунига кўра, жаҳон чемпионатига йўл олган жами 9 нафар ўзбекистонлик боксчидан 5 нафари дастлабки босқичдан муваффақиятли ўтдилар. Қолган тўрт нафар боксчиси бугун, 8 октябрь куни энди баҳсларга киришади.
Изоҳ (0)