Халқаро футбол федерацияси (ФИФА) президенти Йозеф Блаттер, Европа футбол ассоциациялари иттифоқи (УЕФА) раҳбари ва ФИФА вице-президенти Мишель Платини ва ФИФА бош котиби Жером Вальке 90 кунга футбол билан боғлиқ ҳар қандай фаолиятдан четлатилди. Бу қарор, «ТАСС» хабарига кўра, ФИФАнинг этика бўйича қўмитаси томонидан қабул қилинган.
Хабар беришларича, муддат яна узайтирилиши мумкин, бироқ узайтириладиган муддат 45 кундан ошмайди. Қарор қабул қилинган вақтдан бошлаб кучга кирган. Мазкур қарор ФИФАнинг этика бўйича қўмитаси тергов палатаси томонидан олиб борилаётган суриштирув ҳаракатлари доирасида қабул қилинган. Блаттерга нисбатан суриштирув ишларини Роберт Торрес, Платини бўйича эса Ванесса Аллард олиб бормоқда.
Айни вақтда, ФИФА матбуот хизматининг маълум қилишича, Блаттерга исталган кўринишда ташкилот номидан ҳаракат қилиш ёки ФИФА вакили сифатида ОАВ билан мулоқот қилиш тақиқланган. Шунингдек, ФИФА ташкилотнинг собиқ вице-президенти, жанубий кореялик Чхон Мон Жунни олти йилга дисквалификация қилиш ҳақида қарор қабул қилди.
Шунингдек, Мон Жун 100 минг Швейцария франки миқдорида жаримага ҳам тортилди. Этика бўйича қўмитанинг мазкур қарори ҳам қабул қилинган вақтидан бошлаб кучга киради. Жанубий кореялик дисквалификация муддати давомида миллий миқёсда ҳам, халқаро даражада ҳам футбол билан боғлиқ ҳеч қандай фаолият билан шуғуллана олмайди.
Изоҳ (0)