Октябрда таниқли рус шоири Сергей Есенин таваллудига 120 йил тўлди. Унинг ҳаёти ва ижодида мамлакатимиз, жумладан, Тошкент ҳамда Самарқандга ташриф муҳим ўрин тутади, дея хабар беради «Самаркандский вестник».
Есенин Тошкентга 1921 йил, 14 майда, дўсти Александр Абрамов олдига келган. Бу ерда ўтказилган йигирма кун давомида у ижодий учрашувларда қатнашиш, Эски шаҳар, Ўрдани кезиш, Норбековлар хонадонида ўзбек куй-қўшиқларидан баҳра олишга улгурди. Таассуротлари унга Шарқ муҳитига ошно бўлиш, машҳур «Форс мавзулари» туркумини ёзишига туртки бўлди.
Шоир икки кун давомида Самарқандда ҳам бўлиб, бу ердаги обидалар ва осори-атиқалар билан танишди. Бу ташриф уни шу қадар ҳайратга солдики, орадан бир йил ўтиб Италияга саёҳат қилган Есенин «Барибир бу Самарқанд эмас!» дея қайта-қайта таъкидлади.
1942 йилдан бошлаб Тошкентда шоирнинг қизи, журналист ва ёзувчи Татьяна Есенина ҳам фарзандлари ҳамда набиралари билан истиқомат қилган. Пойтахтда 50 йил давомида яшаган ҳамда «Правда Востока» газетасида меҳнат қилган Есенина отасининг уй-музейи очилганда унинг ҳаёти ва ижодига боғлиқ ноёб экспонатларни тортиқ қилди.
Изоҳ (0)