Euronews Ўзбекистоннинг тарихий шаҳарлари ҳақидаги кўрсатувларни суратга олишга тайёргарлик кўрмоқда

5—14 октябрь кунлари Euronews телеканалининг суратга олиш гуруҳи Uzbekistan Life кўрсатуви учун Ўзбекистоннинг тарихий шаҳарлари – Самарқанд, Бухоро ва Термиз ҳақида учта кўрсатув тайёрлаш мақсадида Ўзбекистонда бўлади. Бу ҳақда «Жаҳон» хабар беради.

Суратга олиш гуруҳи таркибида мухбир Катарина Каун ва оператор Фабиан Вельтер ташриф буюради. Ўзбекистон ҳақидаги кўрсатув дунёнинг 155 та давлатидаги 370 миллиондан ортиқ томошабинлар аудиториясига эга Euronews телеканалининг 13 та тилида намойиш этилади.

Ушбу медиа лойиҳа «Ўзбектуризм» Миллий компанияси ва Euronews телеканали ўртасида Ўзбекистоннинг бой тарихий меросини дунёга танитиш мақсадида йўлга қўйилган ҳамкорлик доирасида амалга оширилмоқда.

Эслатиб ўтамиз, Euronews телеканалида сентябрь ойидан бошлаб Самарқанд, Бухоро ва Хива тарихий ёдгорликлари акс этган 30 сониялик реклама ролиги намойиш этила бошланди.  Le Mag рукнида эса Самарқандда бўлиб ўтган «Шарқ тароналари» халқаро фестивали ҳақидаги репортаж узатилди.