Ўзбекистоннинг иккинчи рақамли теннисчиси Фаррух Дўстов Туркиянинг Агри шаҳрида «Челленжер» туркумига кирувчи мусобақадаги иштирокини муваффақиятли давом эттирмоқда.
Мукофот жамғармаси 42 минг 500 еврони ташкил этган турнирнинг биринчи даврасида Фаррух Дўстов австриялик Максимилиян Нюкристни икки сетда ҳам бир хил 6:4 ҳисобида мағлуб этди.
Бугун, 30 сентябрь куни ўтказилган иккинчи давра баҳсида Дўстов литвалик Лауринас Григелисга қарши кортга чиқди. ATP рейтингида 247-ўринни банд этган Григелисдан Фаррух Дўстов 6:2, 7:6 ҳисобида устун келди ва чорак финал йўлланмасини қўлга киритди.
Фаррух Дўстов Агридаги турнирнинг жуфтликлар баҳсида ҳам кураш олиб бормоқда. Сербиялик Иван Бжелика билан тандем ҳосил қилган ўзбекистонлик теннисчи илк даврада туркиялик теннисчилар Муҳаммад Хайлаз ҳамда Сарп Агабигун жуфтлигини 6:4, 6:4 ҳисобида мағлубиятга учратди.
Изоҳ (0)