Япония пойтахти Токио шаҳрида 24 сентябрь куни очилган JATA Tourism Expo Japan – 2015 халқаро сайёҳлик кўргазмасида Ўзбекистоннинг сайёҳлик салоҳияти кенг намойиш этилмоқда, деб хабар беради ЎзА.
Ўзбекистон сайёҳлик ва тарихий жойлар бўйича дунёдаги етакчи ўн мамлакат қаторида туради. Ўзбекистон ҳудудида 7 мингдан ортиқ тарихий ёдгорликлар бўлиб, уларнинг аксарияти ЮНЕСКОнинг Бутунжаҳон мероси рўйхатига киритилган.
«Ўзбектуризм» миллий компанияси Ўзбекистоннинг сайёҳлик салоҳиятини жаҳонга кенг танитиш мақсадида қатор халқаро компаниялар билан яқин ҳамкорлик қилиб келмоқда. Дунё миқёсидаги кўргазма ва ярмаркаларда фаол иштирок этмоқда.
1977 йилдан буён ўтказиб келинаётган JATA Tourism Expo Japan дунёдаги энг нуфузли халқаро кўргазмалардан ҳисобланади. Бу йилги форумда 150 дан ортиқ мамлакатдан мингдан зиёд фирма ва компаниялар вакиллари, эксперт ва олимлар иштирок этмоқда. Кўргазма сайёҳлик саноатининг барча замонавий йўналишларини ўзида мужассам этган. Унда бизнес, экзотика, экологик, спорт ва маърифий саёҳат, круиз, меҳмонхона ва ресторан сервиси, соғломлаштириш каби йўналишларга оид ўнлаб бўлимлар иш олиб бормоқда.
«Ўзбектуризм» компаниясидан маълум қилишларича, кўргазмада Ўзбекистон миллий стенди ўзининг бетакрор дизайни билан иштирокчилар ва мутахассислар эътиборини тортмоқда.
«Мамлакатимизнинг гўзал масканлари ва тарихий обидалари тасвирланган, миллий матолар ва атрибутлар билан безатилган стенд юртимиз ҳақида ёрқин тасаввур уйғотади. Самарқанд, Бухоро, Хива, Тошкент, Шаҳрисабз, Термиз, Қарши, Марғилон, Нукус каби шаҳарларнинг диққатга сазовор жойлари ҳақидаги маълумотлар ва суратларни ўз ичига олган альбомлар, буклет ва нашрлар, шунингдек, халқ бадиий ҳунармандлиги ва амалий санъати маҳсулотлари, турфа сувенирлар ярмарка иштирокчилари эътиборига ҳавола этилмоқда. Ўзбекистоннинг қадимий ва замонавий шаҳарлари, бой маданияти ва тарихи, миллий либос ва мумтоз тароналари кўргазма қатнашчиларида катта қизиқиш уйғотмоқда», — дейилади ЎзА хабарида.
JATA Tourism Expo Japan – 2015 халқаро сайёҳлик кўргазмасида Ўзбекистоннинг «Ўзбектуризм», «Ўзбекистон ҳаво йўллари», «Буюк ипак йўли», Marco Polo Central Asia Travel, Megatour, Darvesh Tour Service, Sheherezade Voyages, Samarkand Global Star, Sitara International, Anur Tour каби компания ва ташкилотлари иштирок этмоқда.
Кўргазма доирасида «Ўзбектуризм» миллий компанияси, Ўзбекистоннинг Япониядаги элчихонаси, Япония сайёҳлик агентликлари уюшмаси (JATA) ва Япония халқаро ҳамкорлик агентлиги (JICA) ҳамкорлигида Ўзбекистоннинг сайёҳлик салоҳиятига бағишланган форум ўтказилиши мўлжалланган.
Изоҳ (0)