Ўзбекистон Республикаси Ташқи ишлар вазирлиги 24 сентябрь куни Макка яқинидаги Мино водийсида юзлаб кишиларнинг ўлимига сабаб бўлган ҳодиса натижасида ўзбекистонлик зиёратчиларга зарар етмаганини тасдиқлади. Бу ҳақдаги баёнот Ўзбекистон ТИВнинг расмий сайтида чоп этилди.
«Ўзбекистон Республикасининг Саудия Арабистони Подшоҳлигидаги дипломатик ваколатхоналарининг маълумотига кўра, 2015 йил 24 сентябрь куни Макка шаҳри яқинидаги Мино водийсида келиб чиққан фожиа оқибатида ҳалок бўлган зиёратчилар орасида Ўзбекистон фуқаролари йўқ», — дейилади Ўзбекистон Республикаси ТИВ баёнотида.
Эслатиб ўтамиз, Мино водийсида зиёратчиларнинг тўпланиб қолиши оқибатида юзага келган тиқилинч туфайли 717 киши ҳалок бўлди, 800 дан ортиқ одам жабрланди.
Олдинроқ Ўзбекистон Вазирлар Маҳкамаси ҳузуридаги Дин ишлари бўйича қўмита Ахборот хизмати Саудия Арабистонида ўзбекистонлик ҳожиларга хизмат кўрсатувчи ишчи гуруҳга таяниб, ҳодиса қурбонлари ва жабрланувчилари орасида Ўзбекистон фуқаролари йўқлигини маълум қилган эди.
Изоҳ (0)