Бостон яқинидаги шаҳарчада истиқомат қилувчи ўқувчи ҳақидаги воқеа АҚШ нашрларида 20 сентябрь куни пайдо бўлганди. WCVB телеканалининг хабарига кўра, 17 ёшли кичик Пол Хюл футбол билан шуғулланганидан сўнг, ўзини жуда ёмон ҳис қилган.
Дастлаб Пол ўзининг аҳволига жазирама ҳаво сабаб деб ўйлади, бироқ кейин ўз пулсини Apple Watch соатларида ўлчаб кўрди. Пулс кўрсаткичи одатдаги нормадан икки баробар юқори эди — қурилма ўқувчининг юраги дақиқасига 145 марта ураётганини кўрсатди.
Йигитча машғулотлардан сўнг бир муддат мизғиб олганидан сўнг ҳам пулс кўрсаткичи ўзгармаган. Шундан сўнг, кўрикдан ўтиш учун шифохонага борган ва у ерда унга рабдомиолиз ҳамда юрак, жигар ва буйрак фаолиятининг бузилиши ташхиси қўйилган. Рабдомиолиз вақтидаги ўткир буйрак етишмовчилиги ўлимга сабаб бўлиши мумкин.
Кичик Хюлнинг сўзларига кўра, агар Apple Watch унга пулси ҳаддан ташқари юқори эканлигини билдириб турмаганида, у ўз ҳолатига нисбатан ҳеч қандай чора кўрмаган бўларди. Отасининг сўзларига кўра, дастлаб «ақлли» соатларни сотиб олиш фикри унга маъқул келмаганди, бироқ ўғли билан юз берган ҳодисадан сўнг у ўзига ва хотинига ҳам биттадан Apple Watch сотиб олган.
Шифокорлар Хюлга футбол билан шуғулланишни тақиқлади, йигитчани эса келаси йил ёзда Apple’нинг бош идорасида малака оширишга таклиф қилишди. Мазкур бахтли ҳодисадан Apple раҳбари Тим Кук ҳам хабар топиб, ўсмирга шахсан ўзи қўнғироқ қилди ва унга янги iPhone ҳамда Купертинода малака оширишни таклиф қилди.
Apple Watch одатий режимда ҳар 10 дақиқада инфрақизил нурланиш орқали юрак пулсини ўлчаб туради. Жисмоний ҳаракатларни бажариш вақтида эса «ақлли» соатдаги юрак уриш датчиги мазкур ахборотни мунтазам равишда қабул қилади.
Изоҳ (0)