LG Magna смартфони Тошкентда 1 млн сўмдан сотувга чиқди

Ўзбекистонда Жанубий Кореянинг LG компаниясига тегишли LG Magna смартфони сотила бошлади, дея хабар бермоқда «Mobinfo.uz». У 2015 йил бошида Spirit ва Leon моделлари қаторида тақдим этилган эди.

Лотин тилида «буюк» деган маънони англатувчи LG Magna смартфони тўрт ядроли процессор ҳамда 5 дюймли HD IPS-дисплей билан жиҳозланган, у In-Cell Touch технологияси туфайли синиқ ойна билан ҳам ишлайверади. Ушбу технологиянинг яна бир афзаллиги шундаки, дисплей бармоқ тегишига тезкорлик билан жавоб қилади.

LG Magna 8 мегапикселли асосий ва 5 мегапикселли олд камера, 2450 мА/соат сиғимли аккумуляторга эга. У селфи ишқибозлари учун махсус яратилган бўлиб, ундаги «Қўл ишораси билан суратга олиш» функциясини ишга тушириш учун олд камерага кафтни очиб кўрсатиш, сўнг яна мушт қилиб қисиш кифоя. Glance View функцияси ёрдамида эса дисплей блокланиб турган ҳолатда ҳам экранда бармоқни пастга юргизиш орқали вақт, сўнгги хабарлар ёки жавобсиз қолган қўнғироқлар каби асосий маълумотларни кўриш мумкин.

Пойтахтдаги «Флешка» савдо мажмуасида LG Magna смартфонини тахминан 1 миллион сўмга харид қилиш мумкин.