«Россия темир йўллари» Ўзбекистонга чипта нархларини деярли ярмига пасайтирди

2015 йил сентябридан бошлаб йўловчилар Россия ва Ўзбекистон ўртасида қатновчи поездларга 45 фоизгача чегирма билан чипта олиши мумкин. Бу ҳақда Россиянинг «Россия темир йўллари» компанияси матбуот хизмати маълум қилди, дея хабар берди «Новости Узбекистана»

Ўзбекистондан келадиган поездлар учун махсус таклиф 2015 йил 30 ноябрига қадар кучда бўлади. Россиядан жўнатиладиган поездларга эса чегирма 2015 йил 1—24 декабрь кунлари жорий этилади.

Чегирмалар фоизи иккала йўналишда ҳам бир хил, вагон тури ёки билет қачон харид қилинганига қараб, 25 дан 45 фоизгача бўлиши мумкин. Масалан, купе ва СВ вагонларига билет учун чегирма 45 суткадан 31 суткагача олдинроқ харид қилинса, 45 фоиз, 30 суткадан 6 суткагача аввал сотиб олинса, 35 фоизга тенг бўлади.

Плацкарта вагонлари учун энг юқори чегирма 35 фоизга тенг ва поезд жўнашидан 45 суткадан 31 суткагача олдин сотиб олинганда амалда бўлади. Мабодо билет 30 суткадан 6 суткача аввал харид қилинса, чегирма 25 фоизга тенг бўлади. Плацкарта, купе ва СВ вагонларига 5 кун олдин ёки ундан камроқ муддатда билет олинса, 5 фоизлик устама қўлланилади.

Чегирма ва устамалар бир мамлакат ҳудудида ҳаракатланаётган поездлар, шунингдек, йўловчиларнинг ташкиллаштирилган гуруҳига татбиқ этилмайди.