Бугун, 23 сентябрь куни Россия президенти Владимир Путин Европадаги энг йирик жомеъ масжидни кенг кўламли реконструкциядан сўнг очиб берди, деб ёзади «РИА Новости».
Москва жомеъ масжиди очилиш маросимида Россия Муфтийлар кенгаши раиси Равиль Гайнутдин, шунингдек, Қозоғистон президенти Нурсултон Назарбоев, Фаластин етакчиси Маҳмуд Аббос, Туркия президенти Ражаб Тоййиб Эрдўғон, Европа давлатлари элчилари қатнашди.
Бундан ташқари, масжид очилишига Чеченистон раҳбари Рамзан Қодиров, Татаристон президенти Рустам Миннихонов етиб келди.
Эслатиб ўтамиз, аввалроқ масжиднинг тантанали очилиш маросимига Россия Федерацияси Муфтийлар кенгашининг раиси, Россия мусулмонлари диний идораси раиси, муфтий шайх Равиль Гайнутдин таклифига биноан Ўзбекистон Вазирлар Маҳкамаси ҳузуридаги Дин ишлари бўйича қўмита Масжидлар бўлими бошлиғи М.Б. Йўлдошев ва Ўзбекистон мусулмонлари идораси Матбуот котиби Ж. Нуриддинов Москва шаҳрига жўнаб кетгани хабар берилган эди.
Маълумот учун, 1904 йилда очилган Москва жомеъ масжиди реконструкция қилинди. Масжид жойлашган ҳудуд 964 квадрат метрдан 18 900 квадрат метрга кенгайтирилган. Бино олти қаватдан иборат, 7 та лифт билан жиҳозланган. Масжид бир пайтнинг ўзида 10 минггача кишини сиғдира олади.
Изоҳ (0)