Миср президенти Абдул Фаттоҳ ас-Сисийнинг фармонига мувофиқ, уч йилга озодликдан маҳрум этилган «Ал-Жазира» телеканалининг Қоҳирадаги мухбирлик пункти раҳбари Муҳаммад Фаҳмий озодликка чиқариладиган бўлди. Бу ҳақда «ТАСС» хабар бермоқда.
Канада фуқаролигига эга мазкур мисрликнинг исми Қурбон Ҳайити муносабати билан эълон қилинган умумий афв (амнистия)га тушган ва 100 маҳбусдан иборат рўйхатда бор. Ундан ташқари, 2013 йил декабрида кўча намойишлари тўғрисидаги қонунни бузганликда айбланиб, ҳибсга олинган Мисрда таниқли шоир ва ёзувчи Умар Хазек ҳам озодликка чиқади.
Амнистия тўғрисидаги мазкур фармон асосида озодликка чиқарилаётганларнинг аксарияти турли йилларда айнан кўча намойишлари тўғрисидаги қонун талабларини бузганликда айбланиб, қамоққа олинган. Улар орасида 2014 йили президент саройи олдида сиёсий маҳбусларни озод этишга қаратилган намойиш вақтида қўлга олинган ва икки йилга озодликдан маҳрум этилган ҳуқуқ ҳимоячиси бўлган аёл — Санъа Сайф ҳам бор.
Афв рўйхатидан жами 16 нафар аёл ўрин олган. Ас-Сисийнинг шахсий кўрсатмасига мувофиқ, уларнинг барчаси 23 сентябрнинг ўзида озодликка чиқарилиши лозим.
Изоҳ (0)