Бразилия ҳукумати 2016 йилги Олимпиада ўйинларининг шиорини эълон қилди

Келаси йил Рио-де-Жанейро шаҳрида ўтказиладиган Олимпиада ўйинларининг шиори «Биз ҳаммамиз – Бразилия» бўлади. Бу ҳақда Folha de Sao Paulo газетаси хабар тарқатди, деб хабар беради Ўзбекистон Миллий олимпия қўмитаси матбуот хизмати.

Маълумотда келтирилишича, ушбу шиор шахсан Бразилия президенти Дилма Руссефф томонидан қабул қилинган. Давлат раҳбари бу борада алоқа ва жамоатчилик масалалари бўйича масъул бўлган ходимлари билан бир неча маротаба маслаҳатлашган.

Таъкидлаш жоизки, Бразилия ҳукумати бир қатор шиорларни кўриб чиққан. Масалан, «меҳнат олтинга айланади» шиорига муҳокама иштирокчилари салбий муносабат билдирган. Бунинг сабаби сифатида, Бразилия Олимпиада ўйинларининг пешқадам давлатларидан бири эмаслигини ва шу боис мазкур мусобақаларда кўплаб олтин медалларга даъвогарлик қилиш эҳтимоли кам эканлигини таъкидлашган.

Тасдиқланган шиорни рекламаси учун сарфланадиган харажатлар, тегишли вазирликлар томонидан ажратиладиган маблағларга боғлиқ. Федерал ҳукумат томонидан ўйинларнинг тасдиқланган умумий бюджети 5,3 миллиард Бразилия реали (тахминан 1,36 миллиард АҚШ доллари)ни ташкил қилади.

Эслатиб ўтамиз, XXXI ёзги Олимпиада ўйинлари 2016 йилнинг 5—21 август кунлари ўтказилади. Бу Жанубий Америка қитъасида ташкил этиладиган дастлабки Олимпиада ўйинлари бўлади.