Ҳиндистон коинот тадқиқотлари ташкилоти (ISRO) сентябрь охирида мамлакат тарихида илк бор коинот кенгликларини электромагнит нурланишининг бир йўла беш диапазонида ўрганадиган Astrosat обсерваториясини учиришга тайёргарлик кўрмоқда. Мутахасссислари обсерватория бортида ўрнатилган UVIT ультрафиолет телескопини яратишда иштирок этган Канада коинот агентлиги билан ҳамкорликдаги лойиҳа қиймати 45 миллион долларга баҳоланмоқда. Бу ҳақда «РИА Новости» хабар берди.
Ҳинд астрофизикларининг таъкидлашича, деярли 20 йил мобайнида яратилган мазкур қурилма биринчи галда ҳозиргача кам ўрганилган рентген юлдузларини кузатади. Бундай юлдузларни оптик, рентген ва ультрафиолет диапазонларда бир пайтнинг ўзида кузатиш уларда жойлашган «қора ўралар» табиатини тадқиқ этиш имконини беради.
Astrosat Андхра Прадеш штатидаги Шрихарикота космодромидан 28 сентябрь куни учирилиши режалаштирилган. Агар парвоз муваффақиятли амалга ошса ва барча синовлардан эсон-омон ўтса, ISRO мутахассислари обсерватория орбитада камида беш йил фаолият кўрсатишига умид қилмоқда.
Изоҳ (0)