NASA сайтида New Horizons сайёралараро станцияси томонидан йўлланган ва Плутон сайёраси яқинидан учиб ўтиш вақтида олинган янги фотосуратлар эълон қилинди. Meduza’нинг ёзишича, фотосуратлар зонд сайёра билан энг яқин нуқтага келганидан 15 дақиқа ўтиб олинган.
Станция «қайрилиб олиб», Плутон сатҳини суратга олган. Суратдаги манзара қуёш нурлари билан қопланганини кўриш мумкин. Қайд этишларича, суратлар июль ойида олинган, бироқ қурилма мазкур суратларни энди Ерга жўнатган.
Бу суратда баландлиги 3,5 минг метргача бўлган Норгея тоғларига туташиб кетувчи Йўлдош водийси (ўнгда) тасвирланган. Бундан ташқари, бу ерда Қуёшнинг ўзига хос ёритиши натижасида Плутон атмосферасининг қатламлари ҳам кўриниб турибди.
Бу фотосурат 18 минг километр баландликдан олинган. Унда тахминан 380 километр ландшафт акс этган. Ўнг томонда — Йўлдош водийси.
2015 йил 14 июль куни New Horizons Плутонга 12,5 минг километр масофагача яқинлашди. Сайёра яқинидан учиб ўтган станция ўз йўлида давом этмоқда — олимлар уни Койпер камари томон йўналтирган.
Изоҳ (0)