Судхўрлик оғир гуноҳ эканлиги таъкидланди

Тошкент шаҳар Учтепа туман бош имом хатиби Қувондиқ Боймуродов судхўрликнинг оғир гуноҳ эканлигини таъкидлаган ҳолда, бир қанча мисолларни келтириб ўтди. Бу ҳақда Ўзбекистон мусулмонлари идораси матбуот хизмати хабар қилмоқда.

«Саҳоба Жобир (розияллоҳу анҳу) ривоят қилади: Пайғамбар (алайҳиссалом) рибо егувчини ҳам, едирувчини ҳам, уни ёзувчи ва унга гувоҳ бўлганларнинг барини лаънатладилар ва ‘Улар тенгдир’, дедилар.

Шунга биноан судхўрликни қайд этишда, олишда-беришда, сақлашда, умуман қандай тарз-да бўлса ҳам, унга кўмаклашиш ҳаром бўлади», — дейилади мақолада.

«Абдуллоҳ ибн Ҳанзала (розияллоҳу анҳу) ривоят қилган ҳадисда Пайғамбар (алайҳиссалом): ‘Кишининг билатуриб судхўрликдан бир динор емоғи, ўттиз олти зинодан (гуноҳда) оғирроқдир’, деганлар (Имом Аҳмад ривояти). Судхўрликнинг ҳаромлиги ҳаммага бир хил, бой-камбағал ҳеч ким ажратилмаган, балки ҳар бир ҳолат, ҳар бир шахсга тааллуқлидир. Қанча-қанча бой-бадавлат кишилар, катта савдогарлар, судхўрлик сабабидан касодга учраганларига воқеълик далилдир. Ҳеч қурса, молининг ҳисоб-саноғи кўп бўлса-да, баракаси бўлмайди. Пайғамбар (алайҳиссалом): ‘Рибода (мол) кўпайса ҳам, оқибати камлик бўлади’, деганлар. Шунингдек, рибо фоизнинг баланд ёки паст бўлиши билан белгиланмайди. Унинг ози ҳам, кўпи ҳам ҳаромдир. Судхўр қиёмат куни шайтону жинлар урган кишидек қабридан алахсираб туради.

Судхўрлик гуноҳини қилган кимса тавба қилса, Аллоҳ таоло афв этади: ‘Агар тавба қилсангиз, дастмоянгиз ўзингизга, зулм ҳам қилмассиз, зулм ҳам кўрмайсиз’ (Бақара, 279). Мўмин гуноҳлардан нафратланиши ва уларнинг қабиҳлигини ҳис этиши зарур. Бошда билмасдан рибо аралашган жойларга бойликларини қўйган ёки риболи ишларга аралашиб қолганлар бўлса, Аллоҳга истиғфор айтишлари ва бундан бошқа пулни кўпайтирадиган ҳалол ва баракали йўлларни излашлари зарур бўлади. Чунки Аллоҳ таоло пок, бинобарин, пок нарсаларнигина қабул қилади. Мусулмонман дегувчи ҳар бир шахс, қандай йўсинда бўлишидан қатъий назар, рибодан фойдаланиши мумкин эмас», — дейилади Ўзбекистон мусулмонлари идораси расмий сайтидаги мақолада.