Урганчлик 30 ёшни қаршилаётган шахс қиш кунларининг бирида Урганчнинг Жайҳун кўчасида истиқомат қилувчи қариндошиникига тўйга айтгани борди. Спиртли ичимлик ичган шахс хонадон келини ёлғиз эканлигини кўргач, уни қўрқитиб, 100 АҚШ доллари, 50 минг сўм пул ҳамда нархлари 700 минг сўм ва 100 минг сўм бўлган иккита уяли алоқа телефонини қўлга киритди, деб ёзади «Ҳуқуқ» газетаси.
Хонадондан чиққанча у Тошкент шаҳрига етиб келди. Такси тўхтатиб, манзилни айтди. Ҳали ҳам маст бўлган талончи йўл-йўлакай қўлидаги пиво шишасини синдириб, таксичининг биқинига тиради ва унинг чўнтагидаги 42 500 сўм пулини олиб қўйди. Кейин эса ҳайдовчига йўлда давом этишни буюрди. Ҳайдовчи ҳаракат хавфсизлигини кузатиб турган йўл-патруль хизмати ходимларини кўриб қолди ва машинани нотўғри ҳаракатлантирди. Йўл қоидаси бузилаётганини илғаган ходимлар унга тўхташ ишорасини қилди. Такси ҳайдовчиси бор гапни айтиб берди.
Газетада қайд этилишича, босқинчи қонун ҳимоячилари томонидан қўлга олинган. Унга нисбатан жиноят иши қўзғатилган.
Жиноят ишлари бўйича Урганч шаҳар судининг ҳукмига биноан, босқинчилик ва талончилик жиноятларини содир қилгани учун у 5 йилу 6 ой муддатга озодликдан маҳрум этилди.
Изоҳ (0)