«Ўзбекистон» телеканалининг «Ахборот» информацион дастури 2 сентябрь сонида Игорь Савицкий номидаги Қорақалпоғистон давлат санъат музейида олиб борилаётган текширув ишлари ҳақида маълумот берди. Бу ҳақда «Газета.uz» хабар қилмоқда.
Хабар беришларича, Ўзбекистон Миллий хавфсизлик хизмати музейда бешта расмнинг йўқлиги ҳолати юзасидан 28 август куни жиноят иши очган. Расмларнинг йўқлиги музейдаги 800 картина ва график ишлар мутахассислар иштирокида, хусусан, ультрабинафша нурли таҳлил ёрдамида ўтказилган текширув ишларидан сўнг маълум бўлган.
Текширувнинг оралиқ натижалари Ганнинг «Ҳордиқда», Кашинанинг «Овулда», Сафроновнинг «Шляпа кийган аёл портрети», Турусовнинг «Узумчи» ва Караханнинг «Лола тераётган аёллар» суратлари ўрнига музейда мутлақо бошқа асарлар сақланаётганини кўрсатган.
«[Madaniyat va sport ishlari vazirligining] Бадиий экспертиза бошқармасининг экспонатларни баҳолаш бўйича комиссияси хулосасига кўра, қайд этилган беш суратнинг умумий баҳоси 581,625 миллион сўмга тенг», — дейилади «Ахборот»даги лавҳада.
Лавҳада, шунингдек, Ўзбекистон санъат музейида 278 та сохта сурат, Ангрендаги галереяда эса рассом Виктор Уфимцевнинг сохталаштирилган ижодий ишлари топилгани ҳақида ҳам ахборот берилган.
Эслатиб ўтамиз, 4 сентябрь куни Нукусда Игорь Савицкийнинг 100 йиллиги нишонланиши керак. 24 август куни музей директори Мариника Бобоназарова ишдан олингани маълум бўлди. Музей жамоаси бунга норозилик билдириб, Маданият ва спорт ишлари вазирлигидан музей коллекциясидаги суратларни алмаштириб қўйиш ва уларни ўғирлаш борасидаги айблар юзасидан текширув ўтказишни талаб қилганди.
Изоҳ (0)