БМТ бош котиби Пан Ги Мун ядровий синовларга қарши кураш халқаро кунида қолган мамлакатларни ядровий синовларни тақиқлаш тўғрисидаги битимни имзолашга чақирди. Бу ҳақда «РИА Новости» хабар бермоқда.
БМТ бош котибининг 29 август, шанба куни тарқатилган мурожаатида қайд этилишича, ядровий синовларни тақиқлаш тўғрисидаги шартнома «ядровий қуролни йўқотиш учун асос ҳисобланади». Унинг таъкидлашича, қабул қилинганидан бери деярли 20 йил ўтган бўлса-да, шартнома ҳали ҳам кучга киргани йўқ.
Шартнома БМТ Бош Ассамблеяси резолюцияси билан 1996 йили қабул қилинган, бироқ бир қатор мамлакатлар, хусусан, АҚШ томонидан ё қабул қилинмагани, ёки ратификация қилинмагани сабаб кучга кирмаган. Европадаги барча мамлакатлар, жумладан, Буюк Британия, Франция ва Россия битимни ратификация қилган.
«Ядровий қуролга эга мамлакатлар томонидан синовлар ўтказилишига нисбатан кўнгилли равишда мораторий қўйилганини олқишлайман, бироқ, яна бир бор таъкидлаш ўринлики, бу ҳуқуқий битим ўрнини боса олмайди», — дейилади Пан Ги Мун баёнотида.
Шу муносабат билан у «қолган мамлакатларга, айниқса, битим кучга кириши учун имзоси зарур бўлган саккиз мамлакатга битимни қабул қилиш ва ратификация қилишни сўраб» мурожаат қилди.
Ядровий синовларга қарши кураш халқаро куни БМТ Бош Ассамблеясининг 2009 йилги резолюциясига мувофиқ ҳар йили 29 август куни нишонланади.
Изоҳ (0)