Эквадор ҳукумати Котопахи вулқонининг эҳтимолий отилишига 121 бошпана тайёрлаб қўйди

Эквадор ҳукумати Котопахи вулқонининг отилиши эҳтимолини ҳисобга олиб, эвакуация қилинадиган аҳоли учун 121 та бошпана тайёрлаб қўйди. Бу ҳақда «ТАСС» хабар бермоқда.

Мамлакат пойтахти Кито шаҳридан атиги 45 километр масофада жойлашган вулқон 22 август, шанба куни 2 километр баландликкача бир неча бор буғ ва кул отди. Вулқон яқинидаги бир неча аҳоли пунктига кул ёғилгани қайд этилди.

Маҳаллий маъмурияти чорва молларини хавфсиз жойлаштириш учун мўлжалланган 47 та жойни ҳозирлаб қўйган ва Мехия кантонида олтита ветеринария клиникаси фаолиятини йўлга қўйган.

Маълумот учун, август ойининг иккинчи декадасида Котопахи вулқонининг фаоллиги сезиларли ошди. Шу сабабли, ҳудудда фавқулодда ҳолат тартиби эълон қилинган. Сўнгги 300 йил давомида мазкур вулқон 50 мартадан ортиқ, сўнгги бор ХХ асрнинг 40 йилларида отилган.