Футбол бўйича Ўзбекистон миллий терма жамоаси ЖЧ-2018 ва Осиё Кубоги-2019 саралаши «Ҳ» гуруҳи доирасидаги Яман ва Филиппинга қарши учрашувларга тайёргарликни 28 августдан бошлайди. Бу ҳақда Ўзбекистон футбол федерацияси матбуот хизмати хабар берди.
Терма жамоа бош мураббийи Самвел Бабаян йиғинга жами 30 нафар футболчини жалб этишни режалаштирилган, бироқ уларнинг барчаси 27 августдан йиғинга кирмайди. Хусусан, ФИФА регламентига мувофиқ, легионер футболчилар клубларнинг рухсати билан Яман билан ўйинга беш кун қолгандагина терма жамоа ихтиёрига учиб кетиш ҳуқуқига эга бўлади.
Ўзбекистон миллий терма жамоасининг «Ҳ» саралаш гуруҳи 3-тур баҳслари доирасида Яманга қарши учрашуви 3-центабр соат 19:00 да Тошкентдаги «Пахтакор» марказий стадионида бўлиб ўтади. Бешта жамоа ўрин олган «Ҳ» гуруҳида 3-турда Шимолй Корея Баҳрайнга қарши баҳс олиб борса, Филиппин терма жамоаси дам олади.
Ўзбекистон терма жамоаси Яманга қарши ўйиндан кейин 6-центабргача Тошкентда шуғулланади. 6-центабр куни эрталаб терма жамоа делегацияси чартер рейс билан Филиппин пойтахти Манилага учиб кетади. Ўзбекистон терма жамоасининг Филиппинга қарши учрашуви 8-центабрда Тошкент вақти билан 20:00 да бошланади.
Маълумот учун, 3-тур олдидан «Ҳ» саралаш гуруҳида Шимолий Корея ва Филиппин 2 та ўйиндан сўнг 6 очко билан пешқадамлик қилмоқда. Кейинги ўринларни эгаллаб турган Баҳрайн, Ўзбекистон ва Яман терма жамоаларида ҳозирча бирорта ҳам очко йўқ.
Изоҳ (0)