Тошкент шаҳар божхона бошқармаси ходимлари йирик миқдордаги сифати кафолатланмаган уяли телефонларнинг ноқонуний айланишини фош қилди. Бу ҳақда бошқарма ахборот хизмати хабар бермоқда.
Божхона ходимлари бошқа ҳуқуқни муҳофаза қилувчи идоралар вакиллари билан ҳамкорликда пойтахт кўчаларидан бирида ҳаракатланаётган фуқаро бошқарувидаги Lacetti русумли енгил автоулови тўхтатиб, кўздан кечирилганда, унда хорижда ишлаб чиқарилган 726 дона уяли телефон ҳамда 386 дона уяли алоқа воситаси аксессуари яширинча олиб кетилаётганлиги аниқланди. Суриштирувлар давомида қоидабузар шахс қиймати 118 миллион сўмлик мазкур товар-моддий бойликларнинг божхона расмийлаштирувини тасдиқловчи биронта ҳам ҳужжатни божхоначиларга тақдим қила олмади ва мазкур ҳолат юзасидан жиноят иши қўзғатилди.
Тошкент шаҳар божхона бошқармасининг «Бошпочтамт» божхона постида пойтахтда истиқомат қилувчи 3 нафар фуқаролар номига АҚШдан йўлланган почта жўнатмалари ўрнатилган тартибда божхона назоратидан ўтказилганда, жўнатмадаги буюмлар орасида тегишли декларацияларда қайд қилинмаган салкам 36 миллион сўмлик 39 дона LG, iPhone 6 ва iPhone 6 Plus уяли алоқа воситалари яширилганлиги аниқланди.
Мазкур ҳолатлар юзасидан ҳуқуқбузарларга нисбатан суднинг тегишли қарорлари билан жазо чоралари қўлланилди ва далилий ашё сифатида олиб қўйилган товарлар давлат эгалигига ўтказилди.
Изоҳ (0)