Ўзбекистонга шоколад ичида диний мазмундаги тақиқланган маълумотлар солинган «флешка»ларни олиб кирмоқчи бўлган шахс қўлга олинди

Уяли телефон хотирасида тақиқланган ва рухсат этилмаган диний мазмундаги материалларни олиб киришга уринаётган шахслар ҳам учраб турибди. Биргина Андижон вилояти божхона бошқармаси ходимлари томонидан 2015 йилнинг биринчи ярми давомида ҳуқуқни муҳофаза қилувчи бошқа идоралар вакиллари билан ҳамкорликда аниқланган 95 та қонунбузарлик ҳолатларида қонунбузарлар томонидан 390 та диний экстремистик ва ақидапарастлик руҳидаги ҳамда бошқа тақиқланган материалларнинг республика ҳудудига олиб кирилишига чек қўйилди. Бу ҳақда Давлат божхона қўмитаси матбуот хизмати хабар бермоқда.

Жумладан, жорий йилнинг 3 апрель куни Андижон аэропортида божхоначилар томонидан Санкт-Петербургдан учиб келган наманганлик С.Нишоновга тегишли қўл ва багаж юклари божхона текширувидан ўтказилганида, юклар орасидаги шоколадлар тасвири назорат-рентген аппаратида шубҳали тарзда акс этди.

Шундан сўнг, божхоначилар томонидан мазкур шоколадлар ўрамлари холислар иштирокида очиб кўрилганда, 1 дона шоколадга унинг рангига мос бўлган ва кўз илғамас ҳажмдаги 2 дона флешкарталари хуфёна тарзда жойланганлиги фош қилинди. Ҳар бири 8 ГБ ҳажмдаги Vortex ва Prima номли ушбу флешкарталар хотираси кўздан кечирилганда, уларнинг ичида диний мазмундаги 14,84 гигабайтга тенг ёки 20 соат давомийликдаги 1230 дона аудио ва видео материаллар жамланганлиги аниқланди.

Диншунослар томонидан ўтказилган экспертиза хулосасига кўра, мазкур аудио ва видео материаллар «Ўзбекистон ислом ҳаракати» экстремистик ташкилоти томонидан тайёрланган диний мазмундаги маърузалар, ИШИД террорчи ташкилотларини мадҳ этишга қаратилган Сурияда тайёрланган ўзбек тилидаги нашидалар ҳамда сохта диний уламоларнинг «исломий халифалик»ни тарғиб этишга қаратилган даъватларидан иборат бўлиб, диний экстремизм, айирмачилик ва ақидапарастлик ғоялари билан йўғрилган ва уларни тарғиб этишга қаратилган.

Мазкур ҳолат юзасидан Жиноят кодексининг 246-моддаси билан жиноий иш қўзғатилиб, Жиноят ишлари бўйича Наманган вилоят судинининг ҳукмига кўра ушбу шахсга нисбатан 5 йил-у 6 ой муддатга озодликдан маҳрум этиш жазоси тайинланди.