Божхона органлари фаолиятини халқаро тармоқда ёритишда маълумотларнинг тезкорлиги, сифати ва даврийлигини таъминлаш, божхона соҳасига доир ахборотларни тақдим этишда самарали усулларни жорий этиш, интернет фойдаланувчилари, хусусан ташқи иқтисодий фаолият иштирокчилари учун сайтдан ўзларига тегишли ахборотларни қисқа фурсатда ва қулай тарзда қўлга киритиш мақсадида 2015 йилнинг 1 августидан бошлаб, Давлат божхона қўмитаси Интернет тармоғида янги такомиллаштирилган веб-сайтини ишга туширди. Бу ҳақда қўмита матбуот хизмати хабар бермоқда.
www.customs.uz манзилида жойлашган мазкур сайт Uzinfocom маркази билан ҳамкорликда ишлаб чиқилган бўлиб, аввалги версияларидан тубдан фарқ қилади. Энг аввало, сайт ортиқча графика, мураккаб структура, ҳаддан ташқари безакларга бурканган дизайн, кўзни чарчатувчи ёрқин ранглардан холи эканлиги билан диққатга сазовор.
Сайт 8 та бўлимда 120 дан ортиқ саҳифаларда ахборотларни тақдим қилиб, содда навигация орқали фойдаланувчи ўзига керакли ахборотни саноқли сонияларда топиши мумкин.
Шунингдек, сайтнинг «Электрон хизматлар» бўлимида фойдаланувчилар учун 9 турдаги интерактив хизматлар кўрсатилади. Масалан, электрон рақамли имзо орқали юридик шахслар «Тадбиркорнинг шахсий кабинети» электрон хизматидан фойдаланиши мумкин. Мазкур хизмат орқали тадбиркорлик субъектлари бевосита ўз фаолиятларига оид 11 турдаги интерактив хизматлар ва маълумотларни қўлга киритиши мумкин.
Божхона органлари фаолиятини Интернет тармоғи орқали ёритишда Давлат божхона қўмитаси 14 йиллик тажрибага эга. Қўмитанинг www.customs.uz веб-сайти илк бор 2001 йилда ташкил қилинган бўлиб, ўтган йиллар давомида 4 маротаба янгиланган.
Сайт фаолияти кенг жамоатчилик томонидан муносиб эътироф этилиб, UZ миллий домени Интернет-фестивалининг «Давлат бошқаруви соҳасидаги энг яхши сайт» номинациясида 2011 йилда 3-ўринни, 2013 йилда 2 ўринни қўлга киритган. Сайт 2012 йил 6 июнда Ўзбекистон Матбуот ва ахборот агентлиги томонидан №0902 сонли рақам билан оммавий ахборот воситаси сифатида рўйхатга олинган.
Изоҳ (0)