Хавфларни ўрганиш бўйича халқаро Verisk Maplecroft компанияси 2012—2014 йиллар мобайнида 198 мамлакат иқтисодиётидаги коррупция ҳолатини таҳлил қилиб чиқди. Бу ҳақда «Insider.pro» хабар бермоқда.
Transparency International, Freedom House ташкилотлари ва АҚШ Давлат департаменти ҳисоботлари асосида тузилган рейтингда Дания энг кам коррупциялашган давлат деб топилди, АҚШ эса 23-ўринни эгаллади.
Қайд этишларича, рўйхатда «энг юқори даражадаги коррупция хавфи» гуруҳига киритилган 73 мамлакатнинг 45 фоизини Саҳрои Кабирдан жанубда жойлашган Африка давлатлари ташкил этади. Бундан ташқари, Яқин Шарқ мамлакатларида ҳам коррупция даражаси юқори эканлиги таъкидланган.
Рейтинг 10 баллик тизим асосида тузилган бўлиб, 0 — коррупция даражаси энг юқори бўлган ҳолатларга, 10 эса коррупция даражаси жуда паст бўлган ҳолатларга нисбатан берилди.
Коррупция хавфи кўрсаткичи бир хил бўлган мамлакатлар рейтингда бир ўринни ўзаро бўлишиб олган, бироқ бу ҳолат кейинги ўринлар тақсимотига таъсир қилади. Яъни, уч мамлакат биринчи ўринни бўлишиб олган бўлса, коррупция хавфи кўрсаткичи уларникидан бироз яхшироқ давлат рейтингда ўз-ўзидан тўртинчи бўлади.
10-ўрин. Жанубий Судан — 0,15 балл
Катта нефт захираларига эга бўлишига қарамай, Жанубий Судан коррупциядан қаттиқ азият чекмоқда.
10-ўрин. Россия — 0,15 балл
Россиянинг коррупция ботқоғига ботганига энг асосий далил сифатида мамлакат футбол бўйича 2018 йилги жаҳон чемпионати мезбонлигини гўёки пора билан сотиб олгани кўрсатилмоқда.
10-ўрин. Мьянма — 0,15 балл
BBC News’нинг 2015 йил майидаги ҳисоботига кўра, Мьянмада «саноатни кўпдан бери ҳарбийлар назорат қилади, мамлакатда коррупция гуллаб-яшнамоқда».
6-ўрин. Ливия — 0,13 балл
Financial Times’нинг апрель ойида чиққан ҳисоботига кўра, Ливиянинг улкан нефт захираларини бошқарувчи шахслар иқтисодиётни самарасиз бошқаришда айбланган.
6-ўрин. Ироқ — 0,13 балл
Ироқдаги коррупция нафақат молия, балки маъмурий ва ҳуқуқни муҳофаза қилиш соҳаларига ҳам кириб борган. Амалдорлар давлат шартномаларини қўлга киритиш мақсадида компанияларни қариндошлари номига рўйхатдан ўтказиб, бюджетни талон-тарож қилади.
6-ўрин. Экваториал Гвинея — 0,13 балл
Human Rights Watch ташкилоти ҳисоботига кўра, 1979 йилдан бери президент Теодоро Обианг Нгема Мбасого қўл остида яшаётган Экваториал Гвинеяда коррупция, қашшоқлик ва қатағонлар давлатнинг вабосига айланган.
6-ўрин. Афғонистон — 0,13 балл
Fiscal Times хабарига кўра, Афғонистон 2016 йили бюджет мажбуриятларини бажара олмайди. Бунга ички даромадлар даражасининг кескин пасайгани сабаб бўлган. Даромадларнинг пасайишига эса ички даромадларнинг учдан бирини ташкил қиладиган божхона йиғимларининг ярми ўғирлангани сабабчидир.
4-ўрин. Судан — 0,12 балл
Суданлик фаол январь ойида The Guardian нашрига берган интервьюсида, жумладан, шундай деганди: «Биз коррупциялашган ҳукуматимиз қурбонимиз».
4-ўрин. Марказий Африка Республикаси — 0,12 балл
BBC News’нинг февралдаги ҳисоботига кўра, мамлакатда коррупция даражаси ўсмоқда ва сердаромад ёғоч ва олмос саноатига зарар етказмоқда.
1-ўрин. Сомали — 0 балл
БМТнинг 2013 йилги ҳисоботига кўра, Сомали марказий банки амалда коррупциялашган тузилмаларнинг пора олиш-бериш жамғармасига айланиб қолган.
1-ўрин. Шимолий Корея — 0 балл
Economic Index of Freedom ҳисоботига кўра, пора олиш ва бериш – Шимолий Корея давлати ва иқтисодиётининг барча бўғинларида кенг тарқалган оддий амалиётдир.
1-ўрин. Конго Демократик Республикаси — 0 балл
Transparency International’нинг 2014 йилги ҳисоботига кўра, Конго ДРда коррупция шу қадар чуқур илдиз отиб кетганки, вазиятни ўнглаш учун ҳеч бир умид йўқ.
Изоҳ (0)